Пайшанба «Ҳуқуқбузарликлар профилактикаси куни» муносабати билан Тошкент вилояти ИИББ Ҳуқуқбузарликлар профилактикаси бошқармаси ва соҳавий хизмат ходимлари томонидан ҳуқуқбузарликларнинг олдини олишга қаратилган тадбирлар ўтказилмоқда. Тадбирлар давомида жиноятларнинг олдини олиш, аҳолининг ҳуқуқий ва ижтимоий муаммоларини ўрганиш ҳамда ҳуқуқий маданиятини оширишга алоҳида эътибор қаратилмоқда.

Масъул ходимлар томонидан жиноятчилик хавфи юқори бўлган ҳудудларда аҳоли билан учрашувлар ўтказиб, профилактик суҳбатлар ташкил этилди. Шунингдек, фуқароларнинг турмуш тарзини ўрганиш ва ҳуқуқбузарликка сабаб бўлувчи шарт-шароитларни аниқлаш мақсадида уйма-уй юришлар амалга оширилди.

Жойлардаги жиноятчилик ҳолати, унинг сабаблари ва оқибатлари жамоатчилик иштирокида муҳокама қилинди. Хусусан, Ўрта Чирчиқ туманида фуқароларга тан жароҳати етказиш, оилавий зўравонлик каби ҳолатлар жойига чиққан ҳолда ўрганилиб, уларнинг олдини олишга қаратилган амалий чора-тадбирлар белгиланди.

Шунингдек, пробация ҳисобидаги шахслар билан суҳбатлар ўтказилиб, уларни қайта ҳуқуқбузарлик содир этишдан қайтариш бўйича иш олиб борилди. Бугунги тадбирлар доирасида спиртли ичимликлар ва гиёҳванд моддаларга мойил шахсларни мажбурий даволашга юбориш чоралари кўрилди.

Ушбу тадбирлар жиноятчиликни олдини олишга, камайтиришга ва жамиятда қонун устуворлигини таъминлашга хизмат қилиши билан аҳамиятли.