Payshanba “Huquqbuzarliklar profilaktikasi kuni” munosabati bilan Toshkent viloyati IIBB Huquqbuzarliklar profilaktikasi boshqarmasi va sohaviy xizmat xodimlari tomonidan huquqbuzarliklarning oldini olishga qaratilgan tadbirlar oʻtkazilmoqda. Tadbirlar davomida jinoyatlarning oldini olish, aholining huquqiy va ijtimoiy muammolarini oʻrganish hamda huquqiy madaniyatini oshirishga alohida eʼtibor qaratilmoqda.

Masʼul xodimlar tomonidan jinoyatchilik xavfi yuqori boʻlgan hududlarda aholi bilan uchrashuvlar oʻtkazib, profilaktik suhbatlar tashkil etildi. Shuningdek, fuqarolarning turmush tarzini oʻrganish va huquqbuzarlikka sabab boʻluvchi shart-sharoitlarni aniqlash maqsadida uyma-uy yurishlar amalga oshirildi.

Joylardagi jinoyatchilik holati, uning sabablari va oqibatlari jamoatchilik ishtirokida muhokama qilindi. Xususan, Oʻrta Chirchiq tumanida fuqarolarga tan jarohati yetkazish, oilaviy zoʻravonlik kabi holatlar joyiga chiqqan holda oʻrganilib, ularning oldini olishga qaratilgan amaliy chora-tadbirlar belgilandi.

Shuningdek, probatsiya hisobidagi shaxslar bilan suhbatlar oʻtkazilib, ularni qayta huquqbuzarlik sodir etishdan qaytarish boʻyicha ish olib borildi. Bugungi tadbirlar doirasida spirtli ichimliklar va giyohvand moddalarga moyil shaxslarni majburiy davolashga yuborish choralari koʻrildi.

Ushbu tadbirlar jinoyatchilikni oldini olishga, kamaytirishga va jamiyatda qonun ustuvorligini taʼminlashga xizmat qilishi bilan ahamiyatli.