Хабар берилганидек, айни кунларда Тошкент вилоятининг шаҳар ва туманларида Республика ишчи гуруҳи томонидан аҳоли билан оммавий сайёр қабуллар ўтказилмоқда.

Белгиланган режага асосан навбатдаги манзил Олмалиқ шаҳри бўлиб, Нурафшон, Олмалиқ, Ангрен, Оҳангарон шаҳар ва Оҳангарон тумани аҳолиси учун ташкил этилди. Қабулда ички ишлар органларига оид мурожаатлар Ўзбекистон Республикаси Ички ишлар вазири ўринбосари, полковник Рамазон Ашропов томонидан қабул қилинди.

Фуқаролар ИИОларига ўқишга, хизматга кириш ва қайта тиклаш, тергов-суриштирув жараёнлари, паспорт масалалари, йўл ҳаракати хавфсизлиги, пробация каби йўналишлари ва бошқа ижтимоий йўналишда мурожаат қилдилар. Мурожаатларнинг аксарияти жойида ижобий ҳал этилиб, қўшимча ўрганишни талаб этувчи мурожаатлар бўйича масъулларга аниқ топшириқлар берилди ва ижроси назоратга олинди.

Шунингдек, қабул давомида вилоят ИИО Пробация хизмати назоратида бўлган 20 га яқин шахснинг мурожаати ҳам тингланди. Вазир ўринбосари улар билан мулоқот чоғида қилмишига чин кўнгилдан пушаймон бўлганлиги инобатга олингани, суд томонидан белгиланган чекловларга қатъий риоя қилиш ва келгусида жиноят содир этишдан тийилиш лозимлиги ҳақида яна таъкидлади.

Масъулларга ушбу шахсларнинг муддатидан олдин шартли озод этилиши юзасидан суд идораларига тақдимномалар киритиш бўйича топшириқлар берилди. Аҳоли билан очиқ мулоқот шаклидаги сайёр қабуллар Тошкент вилояти бўйлаб давом этмоқда.