Республика ишчи гуруҳи томонидан аҳоли мурожаатларини жойида ўрганиш ва уларнинг ижобий ечимини таъминлаш мақсадида Тошкент вилоятида оммавий сайёр қабуллар ташкил этилмоқда.

Қабулнинг биринчи куни Янгийўл шаҳрида бўлиб ўтиб, унда Янгийўл, Қуйи Чирчиқ, Чиноз ва Зангиота туманлари аҳолиси иштирок этишди. Сайёр қабулда, Ички ишлар органларига оид мурожаатлар Ўзбекистон Республикаси Ички ишлар вазири ўринбосари, полковник Рамазон Ашропов томонидан қабул қилинди.

Фуқаролар тергов ва суриштирув жараёнлари, кадастр ва паспорт масалалари, ИИОларига ўқишга ва хизматга кириш, йўл ҳаракати хавфсизлиги, пробация каби йўналишларда ўз мурожаатларини билдирдилар. Мурожаатларнинг аксарияти жойида ижобий ҳал этилиб, тегишли ҳужжатлар расмийлаштирилди. Қўшимча ўрганишни талаб этувчи мурожаатлар бўйича масъулларга аниқ топшириқлар бериб, уларнинг ижроси қатъий назоратга олинди.

Шунингдек, қабул давомида вилоят ИИО Пробация хизмати назоратида бўлган 20 га яқин шахснинг мурожаати ҳам тингланди. Вазир ўринбосари улар билан мулоқот чоғида суд томонидан белгиланган чекловларга қатъий риоя қилиш, меҳнатга ҳалол муносабатда бўлиш ва келгусида жиноят содир этишдан тийилиш лозимлиги ҳақида яна бир бор таъкидлади.

Шу билан бирга, масъулларга ушбу шахсларнинг муддатидан олдин шартли озод этилиши юзасидан суд идораларига тақдимномалар киритиш бўйича топшириқлар берилди. Аҳоли билан учрашувлар ва сайёр қабуллар Тошкент вилояти бўйлаб давом этмоқда.