Respublika ishchi guruhi tomonidan aholi murojaatlarini joyida oʻrganish va ularning ijobiy yechimini taʼminlash maqsadida Toshkent viloyatida ommaviy sayyor qabullar tashkil etilmoqda.

Qabulning birinchi kuni Yangiyoʻl shahrida boʻlib oʻtib, unda Yangiyoʻl, Quyi Chirchiq, Chinoz va Zangiota tumanlari aholisi ishtirok etishdi. Sayyor qabulda, Ichki ishlar organlariga oid murojaatlar Oʻzbekiston Respublikasi Ichki ishlar vaziri oʻrinbosari, polkovnik Ramazon Ashropov tomonidan qabul qilindi.

Fuqarolar tergov va surishtiruv jarayonlari, kadastr va pasport masalalari, IIOlariga oʻqishga va xizmatga kirish, yoʻl harakati xavfsizligi, probatsiya kabi yoʻnalishlarda oʻz murojaatlarini bildirdilar. Murojaatlarning aksariyati joyida ijobiy hal etilib, tegishli hujjatlar rasmiylashtirildi. Qoʻshimcha oʻrganishni talab etuvchi murojaatlar boʻyicha masʼullarga aniq topshiriqlar berib, ularning ijrosi qatʼiy nazoratga olindi.

Shuningdek, qabul davomida viloyat IIO Probatsiya xizmati nazoratida boʻlgan 20 ga yaqin shaxsning murojaati ham tinglandi. Vazir oʻrinbosari ular bilan muloqot chogʻida sud tomonidan belgilangan cheklovlarga qatʼiy rioya qilish, mehnatga halol munosabatda boʻlish va kelgusida jinoyat sodir etishdan tiyilish lozimligi haqida yana bir bor taʼkidladi.

Shu bilan birga, masʼullarga ushbu shaxslarning muddatidan oldin shartli ozod etilishi yuzasidan sud idoralariga taqdimnomalar kiritish boʻyicha topshiriqlar berildi. Aholi bilan uchrashuvlar va sayyor qabullar Toshkent viloyati boʻylab davom etmoqda.