Республика бўйлаб гиёҳвандлик воситалари ва психотроп моддаларининг ноқонуний айланишига, жумладан уларни сақлаш, истеъмол қилиш, етиштириш ҳамда реализация қилиш ҳолатларини аниқлаш ва олдини олишга қаратилган «Қорадори – 2025» кенг кўламли тезкор-профилактик тадбирлари изчил давом эттирилмоқда.

Жумладан, Ангрен шаҳар ички ишлар бошқармаси ва ДХХ ҳудудий бўлинмаси ходимлари ҳамкорлигида навбатдаги тезкор тадбир ўтказилди.

Ангрен шаҳрида ўтказилган тадбир давомида Андижон вилоятида яшовчи, 40 ёшли фуқаро (С.Т.) ўзига тегишли Nexia русумли автомашинасида 597 дона кучли таъсир қилувчи дори воситасини пойтахтга олиб кетаётган вақтида далилий ашёлар билан қўлга олинди.

Тезкор тадбир давом эттирилиб, ушбу шахсни дори воситалари билан таъминлаб келаётган, 1993 йилда туғилган фуқаро (О.Н.) ҳам 900 дона кучли таъсир қилувчи дори воситасини 2 500 АҚШ долларига назорат остидаги харидорга сотаётган вақтда қўлга олинди. Ҳолат юзасидан далилий ашёлар расмийлаштирилди.

Мазкур ҳолат юзасидан ушланган шахсларга нисбатан Ўзбекистон Республикаси Жиноят кодексининг 251¹-моддаси билан жиноят иши қўзғатилиб, тергов ҳаракатлари олиб борилмоқда.

Таъкидлаш жоизки, «Қорадори – 2025» тадбирлари доирасида ўтган 30 кун мобайнида Тошкент вилояти ИИББ ва унинг қуйи тизимлари томонидан 217 та жиноят ҳолати аниқланиб, ноқонуний муомаладан жами 17 килограмм турли номдаги гиёҳвандлик ва синтетик моддалар, шунингдек 11 242 дона кучли таъсир қилувчи дори воситалари олиб қўйилди. Тадбирлар давомида 765 туп гиёҳвандлик ўсимликлари аниқланиб, белгиланган тартибда йўқ қилинди.

Гиёҳвандлик воситаларининг ноқонуний муомаласига қарши курашиш бўйича тезкор ва профилактик чора-тадбирлар изчил давом эттирилмоқда.