Жорий йилда мамлакатимизда жамоат хавфсизлигини таъминлаш ва ҳуқуқбузарликларнинг барвақт олдини олиш тизимини янада такомиллаштириш мақсадида муҳим қарор қабул қилинди. "2025 йилда Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида"ги мазкур қарор асосида жойларда комплекс тадбирлар амалга оширилмоқда.

Ушбу қарор ижросини таъминлаш мақсадида Ички ишлар вазирлиги академиясининг тажрибали профессор-ўқитувчиларидан иборат ишчи гуруҳ Тошкент вилоятининг Чирчиқ шаҳридаги маҳаллаларда ўрганишлар олиб бормоқда. Улар маҳаллалардаги ҳуқуқбузарлик ҳолатларини чуқур таҳлил қилиб, мавжуд муаммоларни бартараф этиш бўйича тавсиялар ишлаб чиқмоқда.

Шунингдек, қарор мазмун-моҳиятини кенг жамоатчиликка етказиш мақсадида секторлар, манфаатдор идора ва ташкилотлар мутасаддилари иштирокида йиғилишлар ўтказилмоқда. Унда қарорда белгиланган вазифалар муҳокама қилиниб, ҳуқуқбузарликларнинг олдини олиш бўйича таклифлар билдирилмоқда.

Шу билан бирга, туман ва шаҳарларда ҳудудий сектор раҳбарлари ҳамда криминоген вазияти мураккаб маҳаллалардаги “маҳалла еттилиги” аъзолари иштирокида сайёр учрашувлар ташкил қилинмоқда. Ушбу учрашувларда жиноятчиликни жиловлаш, жамоат хавфсизлигини таъминлаш ҳамда маҳаллаларда ижтимоий муҳитни барқарорлаштириш масалалари танқидий-таҳлилий тарзда муҳокама қилинмоқда.

ИИВ академияси ишчи гуруҳи томонидан ўтган давр мобайнида “қизил” ва “сариқ” тоифага киритилган 10 та маҳалла атрофлича ўрганилди. Таҳлиллар давомида жами 69 та “жиноят ўчоғи” аниқланиб, уларни бартараф этиш бўйича тегишли чора-тадбирлар белгилаб олинди.

Давлатимиз раҳбари қарорига мувофиқ, маҳаллалардаги криминоген вазиятни илмий-амалий жиҳатдан ўрганиш, ҳудудлар бўйича методикалар ишлаб чиқиш ва жиноятчиликка қарши курашишнинг самарали механизмларини жорий этиш устувор вазифа этиб белгиланган. Бу борада хавфсизликка комплекс ёндашувни татбиқ этиш, яъни профилактик чораларни кучайтириш, ҳуқуқбузарликка сабаб бўлувчи омилларни аниқлаш ва бартараф этиш катта аҳамиятга эга.

Фаолиятнинг янгича тизимда, комплекс тарзда ташкил қилиниши кўзланган натижаларга эришишда муҳим омил ҳисобланади. Ҳозирда бу борадаги ўрганишлар изчил давом эттирилмоқда. Хавфсиз муҳитни яратиш ва ҳуқуқбузарликларнинг олдини олиш бўйича амалга оширилаётган чора-тадбирлар мамлакатимизда ҳуқуқ-тартиботни таъминлаш ва фуқароларнинг осойишталигини таъминлашга хизмат қилади.