Joriy yilda mamlakatimizda jamoat xavfsizligini ta’minlash va huquqbuzarliklarning barvaqt oldini olish tizimini yanada takomillashtirish maqsadida muhim qaror qabul qilindi. "2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida"gi mazkur qaror asosida joylarda kompleks tadbirlar amalga oshirilmoqda.

Ushbu qaror ijrosini ta’minlash maqsadida Ichki ishlar vazirligi akademiyasining tajribali professor-o‘qituvchilaridan iborat ishchi guruh Toshkent viloyatining Chirchiq shahridagi mahallalarda o‘rganishlar olib bormoqda. Ular mahallalardagi huquqbuzarlik holatlarini chuqur tahlil qilib, mavjud muammolarni bartaraf etish bo‘yicha tavsiyalar ishlab chiqmoqda.

Shuningdek, qaror mazmun-mohiyatini keng jamoatchilikka yetkazish maqsadida sektorlar, manfaatdor idora va tashkilotlar mutasaddilari ishtirokida yig‘ilishlar o‘tkazilmoqda. Unda qarorda belgilangan vazifalar muhokama qilinib, huquqbuzarliklarning oldini olish bo‘yicha takliflar bildirilmoqda.

Shu bilan birga, tuman va shaharlarda hududiy sektor rahbarlari hamda kriminogen vaziyati murakkab mahallalardagi “mahalla yettiligi” a’zolari ishtirokida sayyor uchrashuvlar tashkil qilinmoqda. Ushbu uchrashuvlarda jinoyatchilikni jilovlash, jamoat xavfsizligini ta’minlash hamda mahallalarda ijtimoiy muhitni barqarorlashtirish masalalari tanqidiy-tahliliy tarzda muhokama qilinmoqda.

IIV akademiyasi ishchi guruhi tomonidan o‘tgan davr mobaynida “qizil” va “sariq” toifaga kiritilgan 10 ta mahalla atroflicha o‘rganildi. Tahlillar davomida jami 69 ta “jinoyat o‘chog‘i” aniqlanib, ularni bartaraf etish bo‘yicha tegishli chora-tadbirlar belgilab olindi.

Davlatimiz rahbari qaroriga muvofiq, mahallalardagi kriminogen vaziyatni ilmiy-amaliy jihatdan o‘rganish, hududlar bo‘yicha metodikalar ishlab chiqish va jinoyatchilikka qarshi kurashishning samarali mexanizmlarini joriy etish ustuvor vazifa etib belgilangan. Bu borada xavfsizlikka kompleks yondashuvni tatbiq etish, ya’ni profilaktik choralarni kuchaytirish, huquqbuzarlikka sabab bo‘luvchi omillarni aniqlash va bartaraf etish katta ahamiyatga ega.

Faoliyatning yangicha tizimda, kompleks tarzda tashkil qilinishi ko‘zlangan natijalarga erishishda muhim omil hisoblanadi. Hozirda bu boradagi o‘rganishlar izchil davom ettirilmoqda. Xavfsiz muhitni yaratish va huquqbuzarliklarning oldini olish bo‘yicha amalga oshirilayotgan chora-tadbirlar mamlakatimizda huquq-tartibotni ta’minlash va fuqarolarning osoyishtaligini ta’minlashga xizmat qiladi.