Вояга етмаганларга ижтимоий-ҳуқуқий ёрдам кўрсатиш марказида Алишер Навоий таваллудининг 584 йиллиги ҳамда Заҳириддин Муҳаммад Бобур таваллудининг 542 йиллигига бағишланган "Икки буюк сиймо: маънавиятимиз сарчашмалари" мавзусида маърифий-бадиий кеча ташкил этилди.

Алишер Навоий ва Заҳириддин Муҳаммад Бобурнинг бой адабий мероси ёш авлод учун бебаҳо илҳом манбаи бўлиб, уларнинг ватанпарварлик руҳини шакллантиришда муҳим ўрин тутади. Шу боис марказ тарбияланувчиларининг маънавий-ахлоқий қарашларини шакллантириш мақсадида мунтазам равишда тарбиявий ва маърифий тадбирлар ўтказилиб келинмоқда.

Тошкент шаҳар ИИББ тасарруфидаги Марказда бўлиб ўтган ушбу кеча, буюк адиб ва шоирларнинг ҳаёти, ижоди ҳамда уларнинг ватанпарварлик меросига бағишланди. Тадбирда вилоят ИИББ тасарруфидаги марказ бошлиғи подполковник Маҳфуза Сирожова, пойтахт ИИББ тасарруфидаги марказ бошлиғи ўринбосари майор Гулчеҳра Союпова ҳамда ҳар икки марказ тарбияланувчилари ва меҳмонлар иштирок этдилар.

Тадбир давомида тарбияланувчилар томонидан Навоий ва Бобур ғазалларидан бетакрор намуналар ўқилган бўлса, Тошкент туманидаги 4-мактаб ўқувчилари уларнинг асарларидан саҳна кўринишларини намойиш этдилар. Саҳналаштирилган бадиий чиқишлар кеча меҳмонларига тарихий муҳитни ҳис қилдириш билан бирга, буюк сиймоларнинг руҳияти ва ижодий меросини жонлантиришга хизмат қилди. Шунингдек, ўқувчилар томонидан ўз ватанининг мустақиллиги учун охиригача курашган, қаҳрамон саркарда Жалолиддин Мангуберди образи жонлантирилди. Ушбу чиқиш тарбияланувчилар янада руҳлантирди ва улар учун катта илҳом манбаи бўлди.

Сўзга чиққанлар ўқувчиларни улуғ аждодларимизга муносиб авлод бўлишга даъват этиб, уларнинг бой адабий ва маданий меросини чуқур ўрганиш зарурлигини таъкидладилар. Ёшларнинг келажакдаги ютуқлари учун мустаҳкам пойдевор яратилаётгани алоҳида қайд этилди.

Бу каби тадбирлар буюк сиймоларнинг адабий меросини янада чуқурроқ ўрганиш билан бирга, ёш авлодни миллий қадриятларимизга ҳурмат руҳида тарбиялашда муҳим аҳамият касб этиб, уларнинг маънавий камолотига катта ҳисса қўшади.