Voyaga yetmaganlarga ijtimoiy-huquqiy yordam ko‘rsatish markazida Alisher Navoiy tavalludining 584 yilligi hamda Zahiriddin Muhammad Bobur tavalludining 542 yilligiga bag‘ishlangan "Ikki buyuk siymo: ma’naviyatimiz sarchashmalari" mavzusida ma’rifiy-badiiy kecha tashkil etildi.

Alisher Navoiy va Zahiriddin Muhammad Boburning boy adabiy merosi yosh avlod uchun bebaho ilhom manbai bo‘lib, ularning vatanparvarlik ruhini shakllantirishda muhim o‘rin tutadi. Shu bois markaz tarbiyalanuvchilarining ma’naviy-axloqiy qarashlarini shakllantirish maqsadida muntazam ravishda tarbiyaviy va ma’rifiy tadbirlar o‘tkazilib kelinmoqda.

Toshkent shahar IIBB tasarrufidagi Markazda bo‘lib o‘tgan ushbu kecha, buyuk adib va shoirlarning hayoti, ijodi hamda ularning vatanparvarlik merosiga bag‘ishlandi. Tadbirda viloyat IIBB tasarrufidagi markaz boshlig‘i podpolkovnik Mahfuza Sirojova, poytaxt IIBB tasarrufidagi markaz boshlig‘i o‘rinbosari mayor Gulchehra Soyupova hamda har ikki markaz tarbiyalanuvchilari va mehmonlar ishtirok etdilar.

Tadbir davomida tarbiyalanuvchilar tomonidan Navoiy va Bobur g‘azallaridan betakror namunalar o‘qilgan bo‘lsa, Toshkent tumanidagi 4-maktab o‘quvchilari ularning asarlaridan sahna ko‘rinishlarini namoyish etdilar. Sahnalashtirilgan badiiy chiqishlar kecha mehmonlariga tarixiy muhitni his qildirish bilan birga, buyuk siymolarning ruhiyati va ijodiy merosini jonlantirishga xizmat qildi. Shuningdek, o‘quvchilar tomonidan o‘z vatanining mustaqilligi uchun oxirigacha kurashgan, qahramon sarkarda Jaloliddin Manguberdi obrazi jonlantirildi. Ushbu chiqish tarbiyalanuvchilar yanada ruhlantirdi va ular uchun katta ilhom manbai bo‘ldi.

So‘zga chiqqanlar o‘quvchilarni ulug‘ ajdodlarimizga munosib avlod bo‘lishga da’vat etib, ularning boy adabiy va madaniy merosini chuqur o‘rganish zarurligini ta’kidladilar. Yoshlarning kelajakdagi yutuqlari uchun mustahkam poydevor yaratilayotgani alohida qayd etildi.

Bu kabi tadbirlar buyuk siymolarning adabiy merosini yanada chuqurroq o‘rganish bilan birga, yosh avlodni milliy qadriyatlarimizga hurmat ruhida tarbiyalashda muhim ahamiyat kasb etib, ularning ma’naviy kamolotiga katta hissa qo‘shadi.