6 Феврал 2025 йил 3290

ИИВ Академияси курсантлари учун амалиёт бошланди

Тошкент вилояти ички ишлар Бош бошқармасида Ўзбекистон Республикаси Ички ишлар вазирлиги Академиясининг 3-курс курсантлари учун малакавий иш ўрганиш амалиётини бошлашга бағишланган йиғилиш бўлиб ўтди. Тадбирда вилоят ИИББ соҳавий хизмат масъул ходимлари, ИИВ ШХББ Тошкент вилояти бошқармаси ва ИИВ Академияси вакиллари, шунингдек, курсантлар ҳамда уларнинг ота-оналари иштирок этдилар.

Йиғилиш давомида курсантларга бириктирилган мураббийлар таништирилиб, уларга хизмат интизоми ва амалдаги қонунчиликка қатъий риоя қилиш бўйича тегишли кўрсатмалар берилди. Шунингдек, амалиёт жараёнида курсантларнинг касбий маҳоратини ошириш, уларнинг хизмат шароитларига мослаштиришга алоҳида эътибор қаратилди.

Бундан ташқари, ўқиш давомида ўзининг намунали хулқи ва билим даражаси билан ажралиб турган бир гуруҳ курсантларнинг ота-оналари Академия раҳбарияти томонидан ташаккурнома билан тақдирланди ҳамда уларга миннатдорчилик хатлари топширилди. Иш ўрганиш амалиёти курсантлар учун назарий билимларни мустаҳкамлаш ва амалий кўникмаларни шакллантириш имкониятини яратиб, уларнинг келгусидаги профессионал фаолиятига мустаҳкам пойдевор бўлиб хизмат қилади.

Ахборот хизмати

Text to speech