Тошкент вилоятида ўтказилаётган «Хавфсиз ва соғлом юрт» тезкор-профилактик тадбири доирасида ўтган тўрт кун мобайнида вилоят ИИББ ва унинг қуйи тизимлари томонидан «Тиғ» махсус профилактик тадбирлари ўтказилмоқда.

Тадбир давомида кўча ва жамоат жойлари, шунингдек бошқа ҳудудларда ўткир тиғли ашёларни ноқонуний равишда олиб юрган 147 нафар шахс аниқланди. Улардан умумий ҳисобда 149 дона ўткир тиғли ашё (совуқ қурол) аниқланиб, белгиланган тартибда расмийлаштирилиб олинди.

Аниқланган ашёлардан 137 таси пичоқ, 4 таси кастет 2 таси бита бўлса, қолган 6 таси бошқа кўринишдаги тиғли жисмларни ташкил қилган. Ушбу тадбир натижасида содир бўлиши мумкин бўлган қатор ҳуқуқбузарлик ва жиноятларнинг олди олинди.

Маълумот учун: Қонунга хилоф равишда совуқ қурол ёки совуқ қурол сифатида фойдаланилиши мумкин бўлган ашёларни олиб юриш базавий ҳисоблаш миқдорининг 1 дан 5 бараваригача бўлган миқдорда жарима солинишига сабаб бўлиши мумкин. Шунингдек, бошқа қонуний таъсир чоралари ҳам қўлланилиши белгиланган.

Тезкор профилактик тадбирлар Тошкент вилояти бўйлаб давом эттирилмоқда.