Тошкент вилоятида ўтказилаётган “Хавфсиз ва соғлом юрт” тезкор‑профилактик тадбирининг иккинчи босқичи доирасида ўтган 17 кун давомида вилоят ИИББ ва унинг қуйи бўғинлари томонидан “Тиғ” махсус профилактик тадбирлари оʻтказилмоқда.

Тадбир жараёнида кўча ва жамоат жойлари ҳамда бошқа ҳудудларда ўткир тиғли ашёларни ноқонуний равишда олиб юрган 1 273 нафар шахс аниқланди ҳамда улардан шу миқдордаги ашё ўрнатилган тартибда олиб қўйилди.

Аниқланган ашёлардан 1 116 таси пичоқ, 17 таси кастет 6 таси бита бўлса, қолган 134 таси бошқа кўринишдаги тиғли жисмларни ташкил қилган. Ушбу тадбир натижасида содир бўлиши мумкин бўлган қатор ҳуқуқбузарлик ва жиноятларнинг олди олинди.

Эслатиб ўтамиз, қонунга хилоф равишда совуқ қурол ёки совуқ қурол сифатида фойдаланилиши мумкин бўлган ашёларни олиб юриш базавий ҳисоблаш миқдорининг 1 дан 5 бараваригача жарима солинишига, шунингдек, бошқа қонуний таъсир чоралари қўлланилишига сабаб бўлиши мумкин.

Тезкор‑профилактик тадбирлар Тошкент вилояти бўйлаб давом эттирилмоқда.