Toshkent viloyatida o‘tkazilayotgan “Xavfsiz va sog‘lom yurt” tezkor‑profilaktik tadbirining ikkinchi bosqichi doirasida o‘tgan 17 kun davomida viloyat IIBB va uning quyi bo‘g‘inlari tomonidan “Tig‘” maxsus profilaktik tadbirlari oʻtkazilmoqda.

Tadbir jarayonida ko‘cha va jamoat joylari hamda boshqa hududlarda o‘tkir tig‘li ashyolarni noqonuniy ravishda olib yurgan 1 273 nafar shaxs aniqlandi hamda ulardan shu miqdordagi ashyo o‘rnatilgan tartibda olib qo‘yildi.

Aniqlangan ashyolardan 1 116 tasi pichoq, 17 tasi kastet 6 tasi bita bo‘lsa, qolgan 134 tasi boshqa ko‘rinishdagi tig‘li jismlarni tashkil qilgan. Ushbu tadbir natijasida sodir bo‘lishi mumkin bo‘lgan qator huquqbuzarlik va jinoyatlarning oldi olindi.

Eslatib o‘tamiz, qonunga xilof ravishda sovuq qurol yoki sovuq qurol sifatida foydalanilishi mumkin bo‘lgan ashyolarni olib yurish bazaviy hisoblash miqdorining 1 dan 5 baravarigacha jarima solinishiga, shuningdek, boshqa qonuniy ta’sir choralari qo‘llanilishiga sabab bo‘lishi mumkin.

Tezkor‑profilaktik tadbirlar Toshkent viloyati bo‘ylab davom ettirilmoqda.