Ёшларни ватанга садоқат руҳида тарбиялаш ва касбга йўналтириш

Тошкент вилояти ИИББ Кинология хизмати томонидан ИИВ 2-сонли Академик лицейида ўқувчи ёшлар учун амалий чиқишлар намойиш этилди.

Бу тадбир ёшларни кинология хизмати фаолияти билан яқиндан таништириш ва келажакда уларни касбга йўналтириш, ватанпарварлик руҳида тарбиялаш мақсадида ташкил этилди.

Тадбирда кинология хизмати мутахассислари хизмат итларининг жиноятчиликка қарши курашдаги ўрни ва иштироки ҳақида сўз юритдилар. Итлар ёрдамида наркотик воситаларни аниқлаш, жиноятчиларни қидириш ва турли тадбирларда қандай ёрдам бериши бўйича амалий намойишлар ўтказилди. Бу кўрсатмалар ёшларда катта таассурот қолдирди ва кинология соҳасига бўлган қизиқишларини янада оширди.

Кинология хизмати бугунги кунда ички ишлар тизимининг муҳим бўғини бўлиб, жиноятчиликка қарши курашда хизмат итлари жуда самарали восита ҳисобланади. Улар махсус тайёрлов машғулотларидан ўтказилиб, жиноятларни фош этишда, турли фавқулодда вазиятларда инсон ҳаётини сақлаб қолишда, хавфсизликни таъминлашда алоҳида аҳамият касб этади.

Тадбир якунида ўқувчиларга хизмат итларининг ҳар кунги ҳаёти ва уларнинг фаолияти ҳақида қўшимча маълумотлар берилди, шунингдек, ёшларга келгусида ушбу соҳада ишлаш учун қандай малака ва кўникмалар кераклиги тўғрисида тушунчалар берилди.

Бундай тадбирлар ёш авлодни нафақат кинология хизмати фаолияти билан яқиндан таништириш, балки уларни ватанга садоқатли, жамоат хавфсизлиги ва ҳуқуқ-тартиботни таъминлашга ҳисса қўшадиган инсон этиб тарбиялашга хизмат қилади.