13 Октябр 2020 йил 297

Ўрта Чирчиқда жиноий гуруҳнинг бир йўла 12 жинояти фош этилди

Тошкент вилояти Ўрта Чирчиқ тумани Ички ишлар бўлими тезкор ходимлари чорва ўғирлашга "ихтисослашган жиноий гуруҳ"нинг 12 жиноятини бир вақтда фош этди. Улар 7 та маҳаллада аҳолининг 12 бош молларини ўғирлаган.

Жумладан, навбатдаги тадбир давомида "Дархон" МФЙ ҳудудидан уч нафар номаълум шахслар шу ерда яшовчи фуқарога тегишли, тахминий нархи 7 миллион сўм бўлган бир бош қора молни ўғирлаб кетаётган вақтида тезкор ходимлар томонидан жиноят устида қўлга олинган.

Ушланган шахслар – Ўрта Чирчиқ тумани "Майрамкўл" МФЙда яшовчи 26 ёшли, А.Т. ва унинг шериклари 25 ёшли Ш.Ш. ҳамда 36 ёшли Ш.Ш лар эканлиги, улар жиноятларни пухта режа асосида май, август ва сентябрь ойларида содир этганлиги аниқланган.

Шу вақт оралиғида улар томонидан еттита маҳалла ҳудудидан ўғирланган 11 бош қора мол ва 1 бош қўчқор ашёвий далил сифатида олиниб, ўз эгаларига тилхат асосида қайтарилган.

Мазкур ҳолатлар юзасидан Ўрта Чирчиқ тумани ИИБ ТБ томонидан ушланган шахсларга нисбатан Жиноят кодексининг 169-моддаси 2-қисми «в» банди билан жиноят иши қўзғатилган.

Шу ўринда ҳурматли фуқаролардан, ўзларига тегишли бўлган ҳар қандай чорва ёки қорамол ва бошқаларни, дала майдонлари ёки маҳалла ҳудудида қаровсиз қолдирмасликларини ва эътиборсиз бўлмасликларини сўраймиз.

ИИББ Ахборот хизмати

Белгиланган матнни тинглаш учун қуйидаги тугмани босинг Powered by GSpeech