Ўзбекистон Республикаси Президентининг 2022 йил 8 февралдаги «Ички ишлар органларининг эксперт-криминалистика фаолиятини замонавий илм-фан ютуқларини кенг жорий этган ҳолда янада такомиллаштириш чора-тадбирлари тўғрисида»ги қарорига мувофиқ, ички ишлар органларининг эксперт-криминалистика фаолиятини замонавий илм-фан ютуқларини кенг жорий этган ҳолда янада такомиллаштириш чора-тадбирлари белгиланган.

Қарор талаблари ижроси доирасида Тошкент вилоят ИИББ Эксперт-криминалистика маркази ходимлари томонидан академик лицейлари ўқувчилари билан мунтазам равишда ўқув-амалий машғулотлар ўтказиб келинмоқда.

Жумладан, куни кеча ИИВ 2-сонли Тошкент академик лицейида Тошкент вилояти ИИББ Эксперт-криминалистика маркази масъул ходимлари томонидан ўқувчиларга «Ҳужжатларни техник криминалистик экспертизаси бўйича қалбаки диплом ва пулларни аниқлашнинг махсус усуллари» мавзусида навбатдаги маҳорат дарси ўтказилди.

Машғулот давомида ички ишлар тизимида хизмат қилиш тартиби, ходимларнинг жиноятчиликни олдини олиш бўйича амалга ошираётган ишлари, эксперт-криминалистика хизматининг жиноятларни очишда қўллаётган криминалистик техникалари ва техник имкониятлари ҳақида батафсил тушунча берилди.

Шунингдек, вояга етмаганлар ўртасида содир этилаётган жиноятлар, уларнинг ҳуқуқий оқибатлари ҳақида ҳам маълумотлар тақдим этилиб, ўқувчиларнинг ҳуқуқий саводхонлигини оширишга қаратилган муҳокамалар олиб борилди.

Мазкур маҳорат дарслари ўқувчиларнинг назарий билимларини амалиётда мустаҳкамлаш, ҳуқуқий маданиятини юксалтириш ҳамда келгусида ички ишлар органларида фаолият юритиш истагида бўлган ёшларга йўналиш беришда муҳим аҳамият касб этади.