Ички ишлар органлари ходимлари ўртасида жисмоний тайёргарликни мустаҳкамлаш, соғлом турмуш тарзини тарғиб қилиш ҳамда стол теннисини оммалаштириш мақсадида Нурафшон шаҳрида жойлашган Тошкент вилояти ИИББ Жисмоний ва жанговар тайёргарлик марказида стол тенниси бўйича вилоят биринчилиги мусобақаси ўтказилди.

Мазкур мусобақанинг вилоят босқичида ИИББ марказий аппарати ҳамда шаҳар ва туман ички ишлар бўлимларидан 50 нафарга яқин ходим иштирок этди. Қизғин ва муросасиз кечган баҳсларда иштирокчилар ўз маҳоратларини намойиш этишди. Мусобақа давомида ҳар бир иштирокчи ўзининг чаққонлиги ва тезкорлиги билан рақибларини ортда қолдиришга ҳаракат қилди. Якунда кучлилар ғолиб деб топилиб, уларга диплом ва эсдалик совғалари топширилди.

Мусобақа натижаларига кўра, аёллар ўртасида 1-ўринни подполковник Маъмура Абдуллаева (ИИББ) қўлга киритди. 2-ўринни майор Дилдора Файзуллаева (Оққўрғон тумани ИИБ) эгаллаган бўлса, 3-ўрин лейтенант Зуҳра Мирмусаева (ИИББ)га насиб этди.

Эркаклар ўртасида эса 1-ўринни майор Азат Маннапов (Бўстонлиқ тумани ИИБ), 2-ўринни сафдор Абдумўминҳожи Исроилов (ИИББ), 3-ўринни эса капитан Акмал Алижонов (Зангиота тумани ИИБ) эгаллади.

Ушбу мусобақа ички ишлар органлари ходимлари ўртасида спортга бўлган қизиқишни ошириш, жамоавий руҳни мустаҳкамлаш ва соғлом турмуш тарзини шакллантиришга хизмат қилади. Бундай тадбирларнинг мунтазам ташкил этилиши ходимларнинг жисмоний ҳолатини яхшилаш билан бирга, уларнинг хизмат фаолиятига ҳам ижобий таъсир кўрсатади.

ИИББ Ахборот хизмати