Jazo muassasasidan qaytgan shaxslarni ijtimoiy moslashtirish yuzasidan tadbirlar
O‘zbekiston Respublikasi Prezidentining 2024-yil
28-avgust kunidagi PF-127-sonli Farmoniga asosan, ozodlikdan mahrum etish
jazosini o‘tayotgan va qilmishiga chin ko‘ngildan pushaymon bo‘lgan bir guruh
shaxslar afv etildi. Afvga tushganlar orasida Toshkent viloyatida yashovchi 41
nafar mahkum ham bor bo‘lib, ular hududiy Ichki ishlar bo‘limlarining Probatsiya
xizmati hisobiga olindi.
Afv etilgan fuqarolarni ijtimoiy moslashtirish,
moddiy yordam ko‘rsatish, bandligini ta’minlash, tibbiy ko‘rikdan o‘tkazish va
murabbiy biriktirish kabi ishlar belgilangan. Bu chora-tadbirlar ularni
qaytadan jinoyat yo‘liga kirib qolishlarini oldini olishga qaratilgan.
Kuni kecha Nurafshon shahar hokimligida viloyat IIBB va boshqa mutasaddi
tashkilotlar mas’ullari ishtirokida afv etilgan fuqarolar bilan uchrashuv
o‘tkazildi. Uchrashuv davomida har bir afv etilgan shaxs bilan yuzma-yuz suhbat
o‘tkazilib, ularning ijtimoiy moslashuv jarayonlari va qayta jinoyat sodir
etish ehtimolini kamaytirish borasida profilaktik suhbatlar o‘tkazildi.
Shuningdek, tadbirkorlik faoliyati bilan
shug‘ullanish istagida bo‘lganlarga subsidiyalar ajratish va ish topish
istagida bo‘lganlarni bandligi bilan ta’minlash borasida amaliy yordam
ko‘rsatish choralari ham belgilab olindi.
