Toshkent viloyatida o‘tkazilayotgan “Qoradori-2025” tadbiri davomida 110 mln so‘mlik kuchli ta’sir qiluvchi dori vositalari bilan bog‘liq holat aniqlandi.

Toshkent viloyatida o‘tkazilayotgan “Qoradori-2025” tezkor-profilaktik tadbirining ikkinchi bosqichi doirasida viloyat IIBB, DXX viloyat boshqarmasi hamda Zangiota tumani IIB xodimlari hamkorligida o‘tkazilgan tezkor-qidiruv tadbiri davomida kuchli ta’sir qiluvchi dori vositalarini noqonuniy muomalaga kiritishga uringan shaxs qo‘lga olindi.

Aniqlanishicha, tezkor kuzatuvga olingan Toshkent shahrida yashovchi fuqaro (1995-y.t. Sh.A.) boshqaruvidagi “Tracker” rusumli avtomashina Yangi hayot tumani hududida to‘xtatilib, ko‘zdan kechirilgan. Tekshiruv jarayonida avtomashina salonidan jami 99 ta konvalyutada 988 dona “zardex” nomli kuchli ta’sir qiluvchi dori vositasi topilgan. Ashyoviy dalil sifatida hujjatlashtirilgan ushbu vositalarning “qora bozor”dagi umumiy qiymati qariyb 110 million so‘mni tashkil etmoqda.

Holat yuzasidan ushlangan shaxsga nisbatan O‘zbekiston Respublikasi Jinoyat kodeksining 251 prim 1-moddasi bilan jinoyat ishi qo‘zg‘atildi. Hozirda tergov harakatlari olib borilmoqda.

Eslatib o‘tamiz, kuchli ta’sir qiluvchi moddalarni qonunga xilof ravishda muomalaga kiritish, saqlash, tashish yoki sotish holatlari uchun 3 yildan 7 yilgacha ozodlikdan mahrum qilish jazosi belgilangan.