Mamlakatimiz boʻylab eʼlon qilingan tozalik va obodonlashtirish oyligi doirasida Toshkent viloyatida keng koʻlamli amaliy ishlar olib borilmoqda.

Bu jarayonda respublika idoralararo guruhlari va Ichki ishlar vazirligi rahbarligidagi maxsus shtab faoliyat yuritmoqda. Viloyat boʻyicha 22 ta shahar va tumanda jami 44 ta “ekologik patrul” guruhlari tashkil etilgan.

“Toza mahalla – sogʻlom muhit” tamoyili asosida oʻtkazilayotgan tadbirlarga 10 mingga yaqin xodim va jamoatchilik vakillari, 236 ta maxsus texnika jalb etildi. Bir kunda 82 ta mahallada umumxalq hasharlari oʻtkazilib, 1 192 tonna chiqindi chiqarildi, 61 kilometr ariq va kanallar tozalandi.

Shu bilan birga, ekopatrul guruhlari tomonidan 840 ga yaqin ekologik huquqbuzarlik holati aniqlandi. Ular asosan chiqindi tashlash, havo yoki suvni ifloslantirish, noqonuniy qazish ishlari bilan bogʻliq.

Masalan, Bekobodda noqonuniy metall qazish, Yuqori Chirchiqda ruxsatsiz qum-shagʻal olish, Yangiyoʻlda daryo boʻyiga chiqindi toʻkish holatlari fosh etildi. Aniqlangan huquqbuzarlarga nisbatan tegishli tartibda chora koʻrilishi taʼminlandi.

Shuningdek, maktab, bogʻcha va shifoxonalarda sanitariya holati oʻrganilib, 500 ga yaqin aniqlangan kamchilik bartaraf etildi. Obodonlashtirish ishlari doirasida mingga yaqin daraxt koʻchatlari ekilib, mavjudlari oqlandi va shakl berildi. Yoritish chiroqlari hamda kuzatuv kameralari yangilandi.

Bu yoʻnalishdagi amaliy tadbirlar aholi uchun toza va sogʻlom muhit yaratish maqsadida izchil davom ettirilmoqda.