Oʻzbekiston Respublikasi Prezidentining Qarori bilan shahar-tuman hokimlari har oyda profilaktika inspektorlari bilan shaxsan uchrashib, hududlarda jamoat tartibi va fuqarolar xavfsizligini taʼminlash borasida aniqlangan muammoli masalalarni hal qilish choralarini koʻrishi belgilab berilgan.

Mazkur qaror ijrosini taʼminlash hamda viloyat hududida jinoyatchilik va huquqbuzarliklarni oldini olish, fuqarolar xavfsizligini taʼminlashda yuzaga kelayotgan muammoli masalalarga yechim topish maqsadida, joylarda “Toshkent viloyati hokimi va profilaktika inspektorlari uchrashuvi” tashkil etib kelinmoqda.

Jumladan, navbatdagi "Hokim va inspektorlar uchrashuvi” viloyatning Yuqori Chirchiq tumanida boʻlib oʻtdi. Tadbirda Toshkent viloyati hokimi Zoyir Mirzayev, viloyat prokurori Azamat Mirzayev, IIBB boshligʻi Tohir Aripov hamda viloyatning 1-mintaqaviy hududi boʻyicha profilaktika inspektorlari ishtirok etdilar.

Tadbir avvalida xizmat vazifasini vijdonan bajarib, aholi tinchligi va osoyishtaligini taʼminlash hamda jinoyatchilikni oldini olishda jonbozlik koʻrsatgan, namunali inspektorlar alohida eʼtirof etilib, ularning ota-onalariga tashakkur eʼlon qilindi va esdalik sovgʻalari topshirildi.

Tadbirning asosiy qismida, profilaktika inspektorlari tomonidan mavjud savollar hamda muammoli vaziyatlar yuzasidan taklif va ularning qisman yechimlari oʻrtaga tashlandi.

Dolzarbligi jihatdan fuqarolarning ijtimoiy muammolari, ajrim yoqasidagi oilalar, ishsizlik, maktab oʻquvchilari va ota onalarning oʻzaro munosabatlari, hududlarni kameralashtirish, tungi yoritgichlar, taʼmirga muhtoj yoʻllar va boshqa muammoli savollar va takliflar yangradi.

Inspektorlarni tinglagan viloyat hokimi koʻtarilgan muammolarning deyarli barchasi oʻrinli ekanligini taʼkidlab, yechim va ijrosi nazoratga olganini, ayrim muammolar yuzasidan qonun chiqaruvchi organlarga taklif kiritilishini maʼlum qildi.

Uchrashuv davomida 50 yildan ortiq vaqt mobaynida ichki ishlar organlarida xizmat qilgan, isteʼfodagi general-mayor Sayfulla Asadov soʻzga chiqib, mahallalarda faoliyat yuritib kelayotgan profilaktika inspektorlari bugungi kunda eng samarali ishlab kelayotgan tizim ekanini, bildirilayotgan savol va takliflar ham aholining ijtimoiy hayotida oʻrni nechogʻlik muhimligini taʼkidladi.

Shuningdek, viloyat prokurori, Azamat Mirzayev soʻzga chiqib, jamoat tartibi va fuqaro xavfsizligini saqlashda, xizmat vazifalarni sidqidildan bajarayotgan inspektorlar chinakam xalq vakili ekanini hamda viloyat IIO xodimlari misolida xalqchil tizimni koʻrganini bildirdi.

Tadbirga viloyat IIBB boshligʻi yakun yasadi va xodimlarimiz bildirilgan ishonchni oqlab, vatanga va xalqqa sadoqat bilan xizmat qilishda davom etishiga ishonch bildirdi.

IIBB Axborot xizmati