Yurtimizda jamoat tartibini saqlash, jinoyatchilik va huquqbuzarliklarning oldini olish, kriminogen vaziyatni barqarorlashtirish borasida ichki ishlar organlari tomonidan tegishli idora va tashkilotlar bilan hamkorlikda bir qator amaliy ishlar olib borilmoqda.

Xususan, joriy yil 15-apreldan 15-mayiga qadar Toshkent viloyati hududida “Xavfsiz va sogʻlom yurt” shiori ostida keng qamrovli tezkor-profilaktik tadbirlar oʻtkazildi.

Ushbu tadbirlar doirasida kriminogen vaziyatga taʼsir koʻrsatuvchi shaxslarni aniqlash, ularning faoliyatiga chek qoʻyish, huquqbuzarliklarning barvaqt oldini olish, aholi osoyishtaligini taʼminlash, giyohvandlik, psixotrop va kuchli taʼsir qiluvchi vositalarning noqonuniy muomalasiga qarshi kurashish, umuman jinoyatchilikning har qanday koʻrinishiga qarshi kurashishga qaratilgan kompleks chora-tadbirlar amalga oshirildi.

Natijada giyohvandlik moddalarining noqonuniy muomalasi bilan bogʻliq 243 ta holat aniqlandi. Tadbirlar davomida 39,3 kg giyohvandlik vositasi hamda 9 ming 58 dona kuchli taʼsir qiluvchi dori vositasi muomaladan olindi. Narkotik moddalarni targʻib qiluvchi 1 ming 218 ta chizilgan graffiti yozuvi aniqlanib, oʻchirildi. Shuningdek, kuchli taʼsir qiluvchi dori va sintetik giyohvandlik vositalari zakladkasi bilan shugʻullangan 20 nafar shaxs ushlandi.

Shu bilan birga, 9 dona oʻq otar, 21 dona pnevmatik qurol va 283 dona oʻq-dorilar daliliy ashyo sifatida musodara qilindi. Mahallalardagi oʻgʻirlik jinoyatining oldini olish maqsadida xonadonlar, avtoturargohlar va jamoat joylariga kuzatuv kameralari oʻrnatildi. 1 546 ta holatda noqonuniy saqlanayotgan sovuq qurol aniqlanib, 1 600 ta oʻtkir tigʻli jism tegishli tartibda hujjatlashtirilib olindi.

Yoʻl harakati xavfsizligini taʼminlash maqsadida amalga oshirilgan profilaktik chora-tadbirlar natijasida 48 mingdan ziyod qoidabuzarlik holati qayd etildi, shundan 11 mingdan ortigʻi qoʻpol turdagi qoidabuzarlik boʻlib, 446 ta holatda haydovchilar mast holatda transport vositasini boshqargani, 2 ming 800 ta holatda esa haydovchilar tegishli hujjatsiz transport vositasini boshqargani aniqlandi.

Qoʻriqlash xizmati boʻyicha 2 ming 723 ta obyekt, jumladan 2 ming 371 ta xonadon va 352 ta ijtimoiy muassasa texnik qoʻriqlovga olindi. Shuningdek, tergov va sud organlaridan yashirinib yurgan 84 nafar qidiruvda boʻlgan shaxs qoʻlga olinib, 45 nafar bedarak yoʻqolgan fuqaro topildi va oilalariga qaytarildi.

Jamoat xavfsizligini taʼminlash, huquqbuzarliklarning oldini olish va kriminogen vaziyatni barqarorlashtirish borasidagi profilaktik va tezkor tadbirlar izchil davom ettirilmoqda.