Toshkent viloyati IIBB Kiberxavfsizlik boʻlimi va Ohangaron shahar Ichki ishlar boʻlimi xodimlari tomonidan oʻtkazilgan tezkor-qidiruv tadbirlari natijasida, Telegram ijtimoiy tarmogʻida “Alisher Usmonov aksiyasi” nomli 200 dan ortiq guruh ochib, fuqarolarni “Aksiyada 20 million soʻm mukofotiga ega boʻldingiz” kabi soʻzlar bilan aldab, pul mablagʻlarini oʻzlashtirayotgan 7 nafar shaxs qoʻlga olindi.

Maʼlum boʻlishicha, Ohangaron shaharida yashovchi 25 yoshli (Sh.B.) oʻz xonadonida Fargʻona viloyatida yashovchi 18-25 yosh orasidagi 6 nafar shaxslarni jalb qilgan holda Telegram orqali “Alisher Usmonov aksiyasi” nomi bilan 200 dan ortiq guruh ochib, faoliyat yuritgan.

Guruhda fuqarolarga yutuq chiqqanligi haqida yolgʻon maʼlumotlar yuborilib, yutuqni olish uchun badal puli talab qilingan va turli miqdordagi pul mablagʻlarini boshqa shaxslar nomidagi bank kartalariga tushirib oʻzlashtirganliklari aniqlangan.

Tadbir davomida mazkur xonadondan 4 dona kompyuter, 11 dona telefon, Wi-Fi qurilmalari hamda turli bank kartalari daliliy ashyo sifatida olindi.

Dastlabki surishtiruvlarga koʻra, ushbu guruhning har bir aʼzosiga alohida vazifa belgilangan. Bir shaxs soxta chek tayyorlab, guruhlarni nazorat qilsa, boshqasi reklama tarqatish va guruhlarga odam yigʻish bilan shugʻullangan.

Shuningdek, yana biri fuqarolar bilan muloqotga kirishish vazifasini bajargan boʻlsa boshqasi kunlik pul tushumlarini bankomatlar orqali naqdlashtirish bilan shugʻullangan.

Mazkur holat yuzasidan ushlangan shaxslarga nisbatan Oʻzbekiston Respublikasi Jinoyat kodeksining 168-moddasi 3-qismi “g” bandi bilan jinoyat ishi qoʻzgʻatildi. Dastlabki tergov harakatlari olib borilmoqda.