Telegram va Instagramʼda fuqarolarga Kredit limitini naqd pul qilib berishni vaʼda qilib, fuqarolardan olingan jami 1 milliard 32 million soʻm pullarni oʻzlashtirgan anonim shaxslar IIBB Kiberxavfsizlik xizmati xodimlari tomonidan ushlandi. 

Toshkent viloyati IIBB Tezkor qidiruv xizmati “Axborot sohasidagi jinoyatlarga qarshi kurashish boshqarmasi” tezkor xodimlari tomonidan viloyatning Ohangaron tumanida yashovchi 2005-yilda tugʻilgan fuqaro B.N. va uning uch nafar sheriklari qoʻlga olingan. Aniqlanishicha ular, Telegram messenjeri hamda Instagram ijtimoiy tarmogʻida “limitlash xizmati” nomli sahifa ochib, fuqarolarga mikromoliya tashkilotlari tomonidan ajratilgan kredit limitlarini naqdlashtirib berishni vaʼda qilganlar.

Shu orqali gumondorlar oʻzlari roʻyxatdan oʻtkazgan tadbirkorlik subyekti orqali onlayn savdo platformalarida faoliyat yuritib, fuqarolardan olingan jami 1 milliard 32 million soʻm miqdoridagi mablagʻlarini aldov yoʻli bilan oʻzlashtirganlar.

Mazkur holat yuzasidan ushlangan shaxslarga nisbatan Jinoyat kodeksining 168-moddasi 4-qismi “a” bandi (firibgarlik) bilan jinoyat ishi qoʻzgʻatilib “qamoqqa olish” tarzidagi ehtiyot chorasi qoʻllanildi. Hozirda fuqarolarga yetkazilgan moddiy zararlarni undirish choralari koʻrilib, dastlabki tergov harakatlariga kirishilgan.

Eslatib oʻtamiz, Toshkent viloyati boʻylab, noyabr oyi davomida “Kibermadaniyatni yuksaltirish oyligi” eʼlon qilingan. Mazkur oylik doirasida, Axborot sohasidagi jinoyatlarga qarshi kurashish va keng koʻlamli targʻibot tadbirlari kuchaytirilgan tartibda olib borilmoqda.

Maʼlumot oʻrnida, joriy yilning oʻtgan 10 oyi davomida viloyatda sodir etilgan umumiy jinoyatlarning 44 foizini kiberjinoyatlar tashkil etmoqda.

Ushbu jinoyatlarning asosiy qismi, zararli havolalar orqali bank karta yoki akkauntni egallab olish, tovar va xizmatlar uchun oldindan toʻlovni talab qiluvchi soxta bitimlar, soxta kripto birjalar orqali firibgarlik, oʻzgalar nomiga onlayn kredit olish, telefon qoʻngʻiroqlari orqali aldov yoʻli bilan mablagʻlarni oʻgʻirlash holatlari tashkil etadi.