Davlatimiz rahbarining hududlarda kriminogen vaziyatni yaxshilash, jinoyatchilikni jilovlash va mahallalarda osoyishtalikni taʼminlash boʻyicha belgilagan topshiriqlarining amaliy ijrosini taʼminlash maqsadida Toshkent viloyati IIBB boshligʻining oʻrinbosari, podpolkovnik Asilbek Rahmanov boshchiligidagi ishchi guruh Quyi Chirchiq va Oqqoʻrgʻon tumanlarida oʻrganish ishlarini olib bordi.

Jarayon davomida Quyi Chirchiq tumani markaziy shifoxonasi faoliyati oʻrganilib, tuman IIB tergov-tezkor guruhi hamda qoʻriqlash boʻlimi xodimlarining chaqiruvlarga chiqish holati, ularning oʻzaro hamkorlikdagi xizmat faoliyati tahlil qilindi.

Shuningdek, Navqiron mahallasida joylashgan markaziy tayanch punkti faoliyati, xodimlarning xizmatga tayyorgarligi va hududda huquqbuzarliklarning oldini olishga qaratilgan profilaktik ishlar ham koʻzdan kechirildi.

Shu kabi oʻrganish ishlari Oqqoʻrgʻon tumanida ham davom ettirildi. Unda tuman IIB faoliyati, shaxsiy tarkibning xizmatga boʻlgan masʼuliyati, aholining osoyishtaligini taʼminlash, shuningdek jinoyatlarning oldini olishga qaratilgan chora-tadbirlar samaradorligi baholandi.

Oʻrganish yakunida aniqlangan kamchiliklarni bartaraf etish, xizmat intizomini mustahkamlash va huquq-tartibotni taʼminlash boʻyicha masʼullarga tegishli topshiriqlar berildi.