IIV tomonidan respublika boʻyicha oʻtkazilayotgan “Xavfsiz va sogʻlom yurt” tezkor-profilaktik tadbirining ikkinchi bosqichi doirasida Toshkent viloyati IIBB va DXX hududiy boʻlinmalari xodimlari hamkorligida navbatdagi tezkor tadbir oʻtkazildi. Tadbirda kontrabanda yoʻli bilan olib kirilgan qariyb 2 kg giyohvandlik vositasi aniqlanib, noqonuniy muomalaga kiritilishining oldi olindi.

Jumladan, Bekobod shahrida yashovchi, 2001 yilda tugʻilgan shaxs (T.A.) qoʻshni davlatdan kontrabanda yoʻli bilan olib kelingan, 945 gr boʻlgan “gashish” moddasini yashirin joydan olib, 2002 yilda tugʻilgan tanishi (X.S.)ga 100 AQSH dollari evaziga topshirayotgan vaqtda har ikkisi daliliy ashyo bilan ushlandi.

Yana bir holatda, 1995 yilda tugʻilgan shaxs (M.R.) Tojikistondan kontrabanda yoʻli bilan olib kirilgan, Bekobod shahridagi oʻrmon xoʻjaligi hududiga yashirib qoʻyilgan 1 kg “gashish” giyohvandlik vositasini yashirin joydan olib, yetkazib berish evaziga 1000 AQSH dollarini olayotgan vaqtida protsessual tartibda qoʻlga olindi.

Olib borilgan tergovga qadar tekshiruv davomida aniqlanishicha, mazkur giyohvandlik vositalari narkokuryer tomonidan kontrabanda yoʻli bilan “zaklatka” yaʼni yashirin tarzda koʻmilgan holatda qoldirilgan.

Mazkur holatlar yuzasidan ushlangan shaxslarga nisbatan Jinoyat kodeksining 273-moddasi 5-qismi bilan jinoyat ishi qoʻzgʻatilib, hozirda tergov harakatlari olib borilmoqda.