Chirchiq shahridagi qizil toifaga kirgan “Kimyogar” mahallasida jinoyatchilikka qarshi kurash va huquqbuzarliklarning oldini olish borasida tizimli ishlar olib borilmoqda.

Xususan, Toshkent viloyati IIBB Jamoat xavfsizligi xizmati Huquqbuzarliklar profilaktikasi boshqarmasi boshligʻi, mahallaga biriktirilgan holda joyiga chiqib, “mahalla yettiligi” bilan hamkorlikda xonadonbay xatlov oʻtkazdi. 

Amalga oshirilgan choralar natijasida, 11 ta savdo doʻkoni va 3 ta ovqatlanish shoxobchasiga kuzatuv kameralari oʻrnatildi. 15 ta obyekt qoʻriqlash xizmati “tashvish tugmalari”ga ulandi. Aholi gavjum joylarga 2 ta zamonaviy videokamera oʻrnatilib, viloyat IIBB markaziy tizimiga integratsiya qilindi. 108 ta xonadon egasi qoʻriqlash xizmatidan foydalanish uchun murojaat qildi.

Mahallada ijtimoiy masalalarga ham eʼtibor qaratilib, 71 nafar ishsiz fuqaroning bandligi taʼminlandi, xorijda mehnat migratsiyasida boʻlgan 94 nafar fuqaro yashash manziliga qaytarildi. Huquqbuzarlikka moyil shaxslar roʻyxatga olinib, ularning har biri fuqarobay oʻrganildi. “Mahalla yettiligi”ga 74 nafar fuqaro boʻyicha xulosalar taqdim etilib, ijrosi nazoratga olindi.

Yana bir jihat, aholining murojaatlari tezkor koʻrib chiqilayotgani bois, murojaatlar soni qariyb 21 foizga kamaydi.

Mazkur tashabbuslar Oʻzbekiston Respublikasi Prezidentining PQ–1-son qarorida belgilangan “Xavfsiz mahalla” konsepsiyasini hayotga tatbiq etish, jinoyatchilikka qarshi kurashish va aholini ijtimoiy qoʻllab-quvvatlash yoʻlidagi amaliy natijalardan biri boʻlib xizmat qilmoqda.