Toshkent viloyatida yashayotgan fuqaroligi boʻlmagan bir guruh shaxslarga Prezident farmoni bilan Oʻzbekiston Respublikasi fuqaroligi berilib, ID-kartalar topshirildi. Shuningdek, mustaqillikning 34 yilligi arafasida afv etilgan fuqarolar bilan ham uchrashuv oʻtkazildi.

Oʻzbekiston Respublikasi Prezidenti tomonidan olib borilayotgan keng qamrovli islohotlar doirasida fuqarolikka ega boʻlmaganlarni fuqarolikka qabul qilish jarayonlari izchil davom etmoqda. Shu munosabat bilan, Toshkent viloyatida doimiy yashab kelayotgan va ilgari fuqaroligi yoʻq boʻlgan bir qator shaxslar Oʻzbekiston Respublikasi fuqarosi sifatida tan olinib, ularga identifikatsiya ID-kartalari tantanali ravishda topshirildi.

Tadbirda Toshkent viloyati hokimi Zoyir Mirzayev, viloyat IIBB boshligʻi, polkovnik Abduvosit Abdurazakov hamda keng jamoatchilik vakillari ishtirok etdilar.

Soʻzga chiqqan viloyat hokimi Zoyir Mirzayev, davlatimiz rahbarining fuqarolikka qabul qilish borasidagi islohotlari jamiyatda adolat, tenglik va inson huquqlarini taʼminlashga qaratilganini taʼkidladi. Shuningdek, bunday tashabbuslar mamlakatimizda ijtimoiy barqarorlik va farovonlikni mustahkamlashda muhim ahamiyat kasb etishi qayd etildi.

Shuningdek, mustaqillikning 34 yilligi arafasida qilmishiga chin koʻngildan pushaymon boʻlib, afv etilgan bir guruh shaxslar bilan ham uchrashuv tashkil etildi. Tadbir ishtirokchilari bunday tashabbuslarning fuqarolik tizimini takomillashtirish va barcha fuqarolar uchun teng huquqlarni taʼminlashda katta oʻrin tutishini alohida taʼkidlashdi.