Jarayonda ichki ishlar boʻlimlari shaxsiy tarkibining amalga oshirayotgan tungi xizmat faoliyati, hududlarda qoʻllanilayotgan xavfsizlik choralarining samaradorligi va ularning natijalari tizimli ravishda oʻrganildi. Xususan, tunda sodir etilishi mumkin boʻlgan huquqbuzarlik va jinoyatlarning oldini olish, fuqarolar osoyishtaligini taʼminlash maqsadida PQ-1 sonli qaror doirasida xizmatni tashkil etish holati nazoratdan oʻtkazildi.

Toshkent tumanida 29-sonli mahalla huquq-tartibot maskani faoliyati hamda Gultepa mahallasida joylashgan “Qoplonbek” bojxona chegara postidagi IIO xizmat jarayonlari oʻrganildi. Ushbu maskanlarda xizmat qilayotgan xodimlarning tayyorgarligi, huquqbuzarliklarning oldini olishga qaratilgan choralar, shuningdek aholiga qulaylik yaratish maqsadida amalga oshirilayotgan tashkiliy ishlar tekshirildi.

Shundan soʻng ishchi guruh Qibray tumanida faoliyatni oʻrganishni davom ettirdi. Tuman IIB faoliyati hamda 7-sonli mahalla huquq-tartibot maskani sharoitlari, xizmatga jalb qilingan shaxsiy tarkibning tayyorgarligi va mavjud kuch hamda vositalarning tezkor vaziyatni barqaror saqlashdagi roli baholandi.

Jarayon davomida jinoyatchilik koʻp qayd etilayotgan hududlarda amalga oshirilayotgan “ijtimoiy hamkorlik” ishlari, xonadonlar va jamoat joylarida videokuzatuv qamrovini kengaytirish masalalari ham oʻrganildi.

Oʻrganish yakunida aniqlangan kamchiliklar tanqidiy muhokama qilinib, ularni bartaraf etish, xizmat samaradorligini oshirish va aholining osuda hayotini taʼminlash maqsadida masʼullarga tegishli topshiriqlar berildi.

Toshkent viloyati boʻylab ichki ishlar organlari xodimlarining xizmat faoliyati oʻrganish va profilaktik tadbirlari izchil davom ettirilmoqda.