26 Iyul 2025 yil 389

“Anʼanaviy va kiber jinoyatlarni tergov qilish samaradorligini oshirish” mavzusidagi seminar – idoralararo hamkorlik va raqamli kriminalistika imkoniyatlari

Boʻstonliq tumanida prokuratura va ichki ishlar organlari xodimlari, shuningdek, sohaga oid ekspertlar va tadqiqotchilar ishtirokida keng qamrovli seminar tashkil etildi.

Tadbirda Oʻzbekiston Respublikasi Bosh prokurorining birinchi oʻrinbosari Bahriddin Valiyev, Ichki ishlar vaziri oʻrinbosari Ramazon Ashrapov boshchiligida tizimning hududiy rahbarlari va xodimlari ishtirok etdi.

Seminar davomida jinoyatlarni fosh etish va tergov qilish boʻyicha ilgʻor usullar, xususan kiberjinoyatlarga qarshi kurashda zamonaviy texnologiyalar va raqamli kriminalistika imkoniyatlaridan foydalanish masalalari muhokama qilindi.

Huquqni muhofaza qilish akademiyasi Raqamli tergovga koʻmaklashish markazi rahbari B.Qudratov elektron maʼlumotlarni yigʻish, tahlil qilish va sud jarayonlarida qoʻllash usullari haqida batafsil soʻzlab berdi. Maʼruzalarda kiberjinoyatlarni issiq izdan aniqlash, elektron dalillar bilan ishlash va ularni toʻgʻri saqlash boʻyicha amaliy tavsiyalar berildi.

Shu bilan birga, energetika tizimidagi noqonuniy ulanishlar, sugʻoriladigan yer maydonlarini noqonuniy egallash va sotish, transport vositalari bilan bogʻliq hodisalar hamda giyohvandlik vositalari boʻyicha jinoyatlarni tergov qilishning oʻziga xos jihatlari boʻyicha tajribalar almashildi. Mutaxassislar dasturiy taʼminot va texnik vositalarning imkoniyatlarini amaliy mashgʻulotlarda namoyish qildi.

Seminarda muhokama qilingan mavzular jinoyatlarni fosh etish va tergov qilishda ham anʼanaviy usullar, ham zamonaviy axborot texnologiyalaridan foydalanish zarurligini yana bir bor koʻrsatdi. Ishtirokchilarga kelgusida yuzaga keladigan kiberjinoyatlarni samarali tergov qilish uchun doimiy oʻquv mashgʻulotlari va tajriba almashuvlarini davom ettirish tavsiya etildi.

Tadbir yakunida savol-javob va fikr almashuv boʻlib, ishtirokchilar yangi bilim va koʻnikmalarni mustahkamladi. Shu bilan birga ushbu yoʻnalishda namunali xizmat qilayotgan bir guruh xodimlar tashkilotchilar tomonidan mukofotlandi.

Axborot xizmati

Text to speech