Toshkent viloyatida kriminogen vaziyatni barqarorlashtirish va mahallada xavfsiz muhit yaratish maqsadida IIBB boshligʻining birinchi oʻrinbosari, polkovnik Ortiq Xudaybergenov Zangiota tumanidagi “qizil” toifaga kirgan mahallalarda oʻrganish ishlarini olib bordi.

Jarayonda ichki ishlar organlari va mahalla yettiligining ishi tahlil qilinib, amalga oshirilayotgan chora-tadbirlar muhokama qilindi. Zarur koʻrsatmalar berildi va samaradorlikni oshirish boʻyicha aniq choralar belgilab olindi.

Zangiotada kriminogen vaziyatni yaxshilash maqsadida ichki ishlar organlari, mahalla yettiligi va mahalliy hokimiyatlar hamkorligida kompleks choralar amalga oshirilmoqda.

Shuningdek, jinoyatchilik va ijtimoiy muammolarning oldini olish uchun zarur yoʻnalishlar belgilangan. Mahallada ichkilikka ruju qoʻygan, giyohvandlikka moyil va ruhiy kasalliklarga chalingan shaxslarni davolash va reabilitatsiya qilish ishlari olib borilmoqda. Tegishli muassasalar bilan hamkorlik yoʻlga qoʻyilgan.

Shuningdek, “Raqamli xavfsiz mahalla” loyihasi doirasida xavfsizlik tizimi modernizatsiya qilinib, jinoyatlarga oid maʼlumotlarni tezkor tahlil qilish imkoniyati yaratilmoqda. Yoshlar oʻrtasida jinoyatchilikning oldini olishga qaratilgan tadbirlar kuchaytirilib, joylarda xavfsiz muhit yaratishga eʼtibor qaratilmoqda.

Toshkent viloyatida “qizil” toifadagi mahallalarda xavfsiz muhitni yaratish va kriminogen vaziyatni yaxshilash borasida amalga oshirilayotgan tadbirlar natijadorligini oshirishga qaratilgan ishlar davom etmoqda.

IIBB Axborot xizmati.