Ichki ishlar vazirligi tizimida har yili an’anaviy tarzda o‘tkaziladigan “Yilning eng yaxshi tibbiy hamshirasi” ko‘rik-tanlovi tibbiyot xodimlarining fidokorona mehnatini qadrlash, ularning ish faoliyatini yanada takomillashtirish hamda sohada sog‘lom raqobat muhitini shakllantirishga xizmat qilib kelmoqda.

Mazkur tanlov doirasida eng fidoiy va malakali tibbiyot xodimlarini aniqlash maqsadida turli bosqichlarda saralash bellashuvlari o‘tkazilib, g‘oliblar munosib tarzda rag‘batlantiriladi.

Kuni kecha Toshkent viloyati bosqichi Mirzo Ulug‘bek tumani Madaniyat saroyida o‘tkazilib, unda viloyat IIBB Tibbiyot bo‘limining ilg‘or tibbiy hamshiralari o‘z kasbiy bilim va ko‘nikmalarini sinovdan o‘tkazdilar.

Tanlov yakunlariga ko‘ra:
1-o‘rin — Kumushoy Atabayeva,
2-o‘rin — Dilnoza Begaliyeva,
3-o‘rin — Muhabbat Minavarova egalladi.

Tadbir yakunida 1-o‘rin sohibasi tanlovning respublika bosqichida ishtirok etish uchun yo‘llanma bilan taqdirlandi. Shuningdek, barcha g‘oliblarga esdalik sovg‘alar va diplomlar topshirildi.

Mazkur tadbir tizimdagi tibbiyot xodimlarining kasbiy mahoratini yuksaltirish, ularni yanada ruhlantirish hamda sog‘lom raqobat muhitini mustahkamlashga xizmat qildi.